O Rei Mago Tatocau.

Pa fer  estroliquiar a os ninons y ninonas  y pa poner-los más nerviosos do que suelen estar en ixos días de nadal que van  dende a bendizion do Tizón u Tronca  dica o zinco de chinero, se les dize que han de saberse de carrerilla os nombres d'os Reis Magos y cuantos son, pues si s’entivocan no les deixaran cosa en casa. Ya sabez a respuesta d’as criaturas “os Reis Magos d'Oriente son  tres, Melchor, Gaspar y Baltasar” y o que se les contesta pa contradezilos, "son cuatro Melchor,Gaspar,Basaltar y Secayo”.

Y ye una mediaverdad d’as buenas, pues ye zierto que os reis son cuatro , pero o cuarto que no veyemos en as cabalgatas no se clama Secayo, o suyo nombre ye "Tatocau". 

Iste rei arribo en o portal de Belén seis u siete días dimpues que os altros  porque quan  os cuatro Reis Magos d'Oriente, Melchor, Gaspar, Baltasar y Tatocau, ya yeran aman de Belen, uno d’os  aduyantes que veniba zipreniando y cuasi sin poder alentar les dizió que s'habeban ixuplidau d’uno d’os presentes  en o suyo Palazio. Dezidioron que teneba que ir a buscalo o rei más choben pues le costaría menos tiempo. Asinas que a o rei Tatocau, no le quedo otra que chirar coda y eslampar  a por o presente.

Y desde alloras o rei Tatocau ye l’encargau de leyer as zagueras cartas y preparar os encargos de  zaguera hora y ye por ixo que avegadas nos alcuentramos  con  presentes  que ya no esperamos cuasi a meta do mes de chinero. 

“Fe bien a burros y te pagarán con calzes”

“Fe bien a burros y te pagarán con calzes” (Cría cuervos y te sacarán los ojos).

Quino y o mosén d'o lugar yeran vecinos, l'abadía y a suya casa quasi se tocaban paret con paret. Quino teneba a cara ennegrida por o sol, as mans escrebazadas de tanto cubillar con losas y d'apanyar goteras, os suyos uellos brilaban d'una forma espezial y o rictus d'a suya riseta no desapareixeba nunca.
Saludada con cordialidad a o mosén pero no iban dillá d'os buen día y de bell comentario sobre l’orache. Ya feba dos anyos que le debeba os chornals y os cañizos por l'apanyo d'a sacristía, asinas que cada vegada que lo veyeba le dentraban ganas de soltar-le bella fresca. Pero a suya muller le recordada que no yeran buenos tiempos pa estar a mal con dengún y menos con os tricornios u con as sotanas.
Antes d'empezipiar o verano le heba dito o mosén que le mira-se as goteras d'a ilesia de cara l'hibierno y en as zagueras semanas d'agüerro l’en l'heba repetiu en quantas ocasions, él contestaba con un “ya lo miraremos”.
Ixe día rematando noviembre o mosén s'aturó y dimpués de saludar a Quino con un buen día le dizió “Sinyor Joaquín, no sé qué nombre meter-le a una persona que no diz cosa en concreto quan le proposas un trato”. Lo brilo d'os uellos de Quino se fazió más intenso y dimpués d'alentar fundo le contesto: “Ye fazil, a yo puede clamar-me excusero. O que yo no sé, y vusté podrá aduyar-me pues tiene estudios de seminario, como puedo clamar a belún que me debe diners y no paga, y como l’en podreba dezir pa que no s'encarranye y me de o que ye mío”.
O mosén le dizió con una riseta “Sinyor Joaquín, vusté hese estau buen cura” y siguió caminando.
Encara le costo días en saldar a cuenta pero lo fazió antes d'as primeras nieus, sabeba que si no pagaba, as goteras no s'apanyarían ixe hibierno.
https://chambretas.es/

O mixino filosofo

En un callizo entre a cuadra do bestiar y o gallinero , dos mixinos yeran charrando da vida. O mixino royo, que yera o más viello, no se baixaba d’entalto una toza sino pa refregase a lomera con o mango d’una estral que astí yera emparada. L’atro mixino, chobenet y griso como a zenisa, no paraba quieto y no feba más que prebar d’acazase a coda. 

O mixino royo le diz: “Pero quiers aturate y deixar a coda quieta ”. O mixinet contesta: “Soi estudiando en a escuela de Filosofía pa Mixinos y nos han ensenyau que i hai dos cosetas a tener presente . A primera que a felicidat ye o más important, y l'atra, que a felicidat se troba en a coda. Asinas que he decidiu enrestir a coda y quan la enganche bien enganchada, tendré a felicidat eterna”.

O gato viello lo mira y le diz: “Sabes? yo no he iu ta la escuela de Filosofía como tú. A mía vida ha pasau entre callizos y asti he aprendiu que a felicidat ye o más important y tamién que la tiengo en a coda. Pero por contra do que tu fas yo no pierdo o tiempo prebando d’engancharla, pues alla t’ande vaya y por malo que sea o camín a coda siempre viene con yo“.

www.chambretas.es

A raboseta y os uegos

Un día, una rabosa fambruda s'amanó a un corral. A l'atro costau d'a cleta veyió una zesta plena de uegos que le fazioron laminase o morro.

-Qué buenos deben estar! He d'aconseguir uns quantos -pensó a rabosa.

Dio un blinco pero a cleta yera altisma. Tornó a prebar-lo pero no podió . 

-Caray! –exclamó y prebo de fer un forau esgarrapando per debaixo d'a cleta pero l'alazet yera fondo, y una vegada más tornó a fallar.

Cansa d'o suyo inutil esfuerzo, a rabosa marchó dezindo:

-Ya no quiero ixos uegos. Seguro que serán bofos u pudrius y ya en trobare de millors en altro corral.

“No pienses en os fracasos, piensa en os nuevos retos”

www.chambretas.es

Onofre y o Bubón

Onofre, persona bonachona y un tanto curto de miras, heba visto un reportache en a televisión sobre os loros y a suya capazidat d'emitir parolas. Asinas que dezidio ir a mercar uno d'istos muixons charradors. 

O botiguero le explico que no en teneba pero debant d'a insistenzia d'Onofre y dando-se cuenta que yera mesache d’engaño fazil, l’amuestro un Bubón que teneba, le dizió que se clamaba Tomasón y pa que aprendese a charrar heba de dezir-le “Mete atenzión Tomasón” antis de cada parola.

A lo cabo d'uns días tornó Onofre ta la botiga a mercar minchar pa la rapaz y o botiguero le preguntó si Tomasón ya charraba. Encara no, le respondió, pero quan le digo “Mete atenzión Tomasón”, ubre os güellos que son grandizos como a boca das cobanetas ,y se me queda mirando ta cara fixo e interesau, asinas que bien seguro no tardará muito en charrarar-me.

"Pensaz muito y con calma antis de fer un trato pues avegadas as ganas se tornan desganas".